Artikel Kiriman Laenta R. Simanjuntak (Personil Bass)

Bindu 25
Nabisuk Nampuna Hata,
Na Oto Tu Panggadisan

Ijuk di parapara, hotang dipallabian. Na bisuk do nampuna hata, alai na oto ma tu panggadisan. Huroha nungnga somal masa pangalaho sisongon i di tongatonga ni halak hita na jolo. Ai molo angka nabisuk, angka jolma parhata do i, namalo mangalusi nasa hata, mangalusi sungkunsungkun nang mangalusi na di bagasan roha. Alai molo halak na oto, mura ma i otootoan. Ai manang aha nidok, manigor i do undukononna. Aha na hinatahon, manigor i do haporseaonna. Halak na oto mamparhatutuhon luhut hatahata, alai anggo halak na bisuk, ditimbang do langkalangka. (Poda 14 :15).

Asa si jalahan do habisuhon, ai marhite ido gabe jolma sitangihonon ni halak iba. Alai sabalikna, sipasidingon jala sipadaoon ma haotoon, asa unang gabe marlomolomo halak tu iba. Parhata do na bisuk, sitangihononhon jala sisungkunon di ragam ni hapistaran. Alai sai si sogo do halak na oto, ai ndang mangantusi aha na masa, aha na niulana, jala ndang tarpasingot di haotoonna. Togir do dalan ni na oto di rohana, alai anggo halak napistar, olo do tumangihon hata sipaingot.’ (Poda 12:15). Sisogo do nang halak na oto di tongatonga ni bagasna, alai gabe anak halasan do angka anak na pistar di tongatonga ni jabuna. “Anak napistar palas roha ni amana, alai jolma na oto sahali do manang ise na olo palea inana” (Poda 15:20). “Hajepolon ni amana do halak na oto, jala arsak ni roha ni inana tumubuhon ibana. “ (Poda 18:25).

Adong do na mandok, anggo umpasa i sasintongna songon on do : Na bisuk nampuna hata, asa unang adong na oto na gabe tu panggadisan. Na uli ma tutu i molo gabe halak na bisuk mangondihon halak na oto. Alai pangantusion di halak hita Batak ma ra i. Manang pangantusion si saonari on na ma i. Ai hira so masuk do tu roha molo gabe adong na bisuk na mangondihon halak na oto. Ai alana, umbahen na oto pe didok ibana, ndada ala ni holan na humurang pingkiranna, alai alani jungkat ni rohana do. Alai na adong do di ibana pangalaho na roa, na jahat, na sai manuntun lomona, na so olo marpanungkun manang tu ise pe, atik pe so diboto agia aha. Asa ndang tarpadomu halak nabisuk tu halak na oto.

Adong sada halak na losok marsingkola, na gabe dajal ibana di huta, jala holan na manusai natorasna ulaonna. Halak na oto do rajumon ibana. Ai pareme do nian natorasna, parhauma na bidang, alai nanggo SD pe ndang tammat ibana. Hira holan ibana nama di huta sian angka dongan torbangna. Hira ibana do na umoto sian dongan magodangna. Alai molo manghatai do, ndang na taralo ibana. Lumobi molo marpollung dohot marhata mangmang. Hatna do sude nasa hata.
Di sada tingki dijujui natorasna ma ibana laho mangaranto, tu Kalimantan manang tu Irian Jaya. Ala tammat SD do ibana, tusi nama dirajumi roha ni natorasna na boi ibana laku. Alai ndang diolio ibana hata ni natorasna i. Olo do ibana mangaranto, asal ma tu Jakarta. Ala sai di jugulhon do ingkon tu Jakarta mangaranto, gabe dipaborhat natorasna ma ibana. Disuru ma ibana manopot angkangna, anak ni bapatuana sian ompungna na martinodohon. Nunga direktur perusahaan anak ni angkangna i di Jakarta. Dibahen natorasna ma surat boanonna, hira dalan patandahon anakna i tu anak ni angkangna i, anggiat boi adong dibahen karejona, manang karejo aha pe taho. Ai ianggo di natorasna i, asal ma unang di huta be anakna i. Ai holan manusai natorasna do ulaonna.

Borhat ma ibana tu Jakarta. Jala jumpangsa do angkangna tubu ni amangtuana sian ompung na martinodohon i. Tinggal di jabu ni angkangna i ma ibana paima adong karejona. Disada tingki, di jou angkangna i ma ibana manghatai. Disungkun angkangna i ma ibana dohot harorona.
“Jadi puang anggia, nungnga hujaha surat ni uda na binoanmi. Namangalului karejo do ho hape tu Jakarta on.”, ninna angkangna i ma mamungka pangkataion nasida.
“Tutudo angkang, na mangalului karejo do ahu ro tu Jakarta on!”, ninna ibana mangalusi.
“Antong, molo songon i, sarjana aha ma ho puang, sarjana ekonomi do manag na insinyiur, asa bi noto pahombarhon tu parkarejoan siluluan tu ho”, ninna angkangna i.
“Dia ma dohon angkang. Songon dia bahenon gabe sarjana, ai hansit do ngolu dihuta. Jala ndang ala na sarjana ahu umbahen na ro tu Jakarta on, laho mangalului karejo do. Jadi urupi angkang ma jolo ahu asa adong karejongku.”
“Bo, ndang sarjana ho hape. Antong, molo songon i, jurusan aha ma ho tahe di SMA ? IPA do manang na IPS ?”, ninna angkangna i muse manungkun.
“Bah i pe, dia ma dohonon angkang. Ai dung ro Indorayon siboan nabusuk i, so adong be hasea pangulaon ni halak papak. Asa mansai hansit do ngolungolu alani na masa i. Ido umbahen na songon on ahu.”
“Bah, jadi dang tamat ho sian SMA ? Na laos holan tamat SMP do ho ?”, ninna angkangna i muse. Nunga longang rohana mambege alus ni angina i.
“Ba, tung i pe nuaeng, dia ma dohon angkang. Ai leleng do omak na marsahitsahit i. Dibege angkang do ra na marbulanbulan omak obname di rumasakit Balige. Jadi tung so tarhatahon do i sude”’ ninna mangalusi angkangna i. Lamboklambok do dihatahon hatana i, hape ianggo angkangna i nunga mulai pangarimason umbegesa.
:Jadi maksudmu, na so tammat do ho nanggo SMP? Na holan tamat SD do ho ?”, ninna angkangna i dohot soara nagogo. Nungnga jut rohana jala muruk idaon.
“Ba, tung i pe nuaeng dia ma dohonon angkang. Nunga bagianniba songon on. Na ringkot nuaeng di ahu, tung lului angkang ma jolo karejongku!”.
“Jadi SD pe hape ndang tamat ho ? Ah, ndang huantusi be i”, ninna angkangna i, huhut mansampathon surat ni udana i tu meja na di jolona, na sai tiniopna sian nangkin. “Ndang huboto boasa suruon ni uda ho tu Jakarta on. Aha ma na boi karejom? Ndang adong! Jadi ndang tarbahen ahu mangalului karejom. Ho ma namanontuhon karejom. Anggo ahu, tung so tarbahen aho do mangalului karejom,” ninna angkangna i di bagasan murukna. Alai sai lambok do anggina i mangalusi. Hira na so diboto do idaon naung muruk angkangna i. Gabe didok ma:
“Burju ni angkang do na mandok asa ahu manontuhon karejongku?”, ninna ibana.
“Olo, ho ma manontuhon. Dok ma saonari, aha ma karejom didok roham.” Ninna angkangna i mardongan muruk.
“Mauliate ma. Botima i angkang. Hubege sian bapak, nungnga direktur hape angkang nuaeng!”, ninna mansai lambok.
“Olo, jadi aha maksudmu?” ninna angkangna i hatop, ai naeng botoonna aha na di roha ni anggina i.
“Maksudhu nian angkang, sapala naung ro ahu tu Jakarta on, bahen angkang ma ahu gabe wakil direkturmu!”
“Aha nimmu? Bodat! So ditanda ho do dirim!!!”, ninna angkangna i huhut di tinggalhon anggina i.
Ndang sadia leleng mulak ma anggina i tu huta ala so adong karejo dapotsa di Jakarta. Na jumorbut muse, gabe mar hata balik do ibana tu natorasna. Ai didok do, na mansai kejam angkangna i, jala manigor ginjang do rohana ala naung direktur i. I ma panghorhon ni haotoon i, na so boi mangantusi halak jala ndang mananda dirina. Asa ndang tarpadomu halak na oto tu halak na bisuk.

Di ganup bangso sai adong do halak na bisuk, suang songon i nang halak na oto. Jala ganup bangso do marsintasinta asa gabe angka jolma nabisuk angka jolma bangso i, jala sai unang ma nian adong halak na oto. Alai asing do pangantusion ni bangso Jahudi taringot tu halak na oto dohot na bisuk, lumobi molo pinartimbanghon tu pangantusion ni angka bangso na asing. Mangihuthon halak Jahudi, sian Debata do Habisuhon, alai sian portibi on, jala sian sibolis do haotoon. Ala sian Debata do habisuhon i, asa manang ise na mabiar mida Jahowa sai na dapotan habisuhon do. I do umbahen na didok: “Biar mida Jahowa do parmulaan ni hapistaran, jala parbinotoan ni angka na badia do hapantason” (Poda 9:10). “Biar mida Jahowa do parmulaan ni parbinotoan, alai halak na oto manoisi hapistaran dohot pangajaran” (Poda 1:7).

Asa molo di tongatonga ni bagas ni halak Jahudi ndada pola sai tarbege poda ni natoras tu anakhon na mandok: Unang ula hajahaton ate! Ulahon ma na denggan ate! Ndang songon i poda nasida. Alai na somal poda ni natoras tu anakna i ma: Ingkon halak napistar do ho ate! Ingkon halak nabisuk do ho! Sotung gabe halak na oto ho! Lapatan ni i, molo di halak Jahudi: Ingkon si oloio Debata do ho ate, ingkon habiaranmu do Debata asa gabe halak nabisuk ho. Sotung gabe si oloi si bolis ho. Sotung gabe halak naoto! Asa habisuhon ndada holan marpardomuan tu pingkiran manang hamaloon, alai dohot do tu haporseaon dohot pangoloion tu Debata. Suang songon i do nang haotoon, ndada holan nahurang dipingkiran, alai nahurang diharohaon do dohot haporseaon. Ala dang di tanda na oto Debata dohot lomo ni rohaNa.

Asa mansai bagas do lapatan ni hapistaran dohot habisuhon di bangso Jahudi. Ai ndada holan parbinotoan sambing i, alai dohot do panandaon tu Debata. Paboa halak napistar halak, sai na ulahonon ni i do lomo ni roha ni Debata. Alana, mantat pasupasu ni Debata do ganup ulaon nahombar tu lomo ni roha ni Debata. Molo napistar sadasada halak, dang olo i mambahen na hinasogohon ni roha ni Debata, ai ibana sandiri do na rugi disi. Alai anggo na oto, ndang dirohahon i dia lomo ni roha ni Debata jala dia na solomo ni rohana. Hape molo di ulahon na so lomo ni roha ni Debata, mangae ma ibana. Ai ndang tarpasupasu be ulaonna. Baliksa gabe uhum do na ro tu ibana.

I do umbahen di dok apostel Jakobus: “Ise hamu nabisuk jala na pantas marroha? Sian denggan ni parangena ma dipataridahon ibana angka ulaonna mar hitehite halambohon ni habisuhon i” (Jak 3:13). Ai habisuhon i sian ginjang do i, sian Debata. Mamboan dame dohot las ni roha do habisuhon i, ndada laho manusai jolma. Asa manang ise na mameop habisuhon na sian Debata, na bontor do i, na lambok, olo mardame jala siboan dame. Gok las ni roha do ibana, jala dibagasan dame ibana manabur angka hatigoran tu saluhut halak (Jak3:17-18).
Asa angka na pistar jala na bisuk do halak na porsea tu Debata. Alai angka na oto do jolma na so porsea tu Debata. Di buku Poda Raja Salomo didok songon on: “Sai eahi hapistaran, eahi ma tutu pangantusion; unang tung halupahon, jala unang tundali angka hata ni pamanganku” (Poda 4:5). “Tuhori ma hasintongan, jala unang gadishon hapistaran, pangajaran dohot roha hapantason” (Poda 23:23). “Parmulaan ni hapistaran on do: Tuhori hapistaran i, jala tuhorhon sandok na niomom tumuhor pangantusion” (Poda 4:7). Ima paboa na ringkot hapistaran i. “Ai umarga do hapistaran sian mutiha, jala saluhut mata intan ndang tarpatudos tusi” (Poda 8:11). Asa manang ise na mangeahi hapistaran, na mangalului habisuhon do i. Manang ise na manjalahi parbinotoan, na pahombarhombar tu lomo ni roha ni Debata do nasinangkapan ni rohana. Alani i sai unang ma adong na oto ianakhonta. Alai sai tubu ma anak na bisuk jala na pistar, na mambahen las roha ni amana dohot inana, suang songon i situan natorop. Jala gabe halomoan ni Debata ma nang ibana, antong!